| A Xunta pon en marcha o Plan Impulsa Ourense para apoiar novos investimentos na provincia |
 O consello de dirección do IGAPE, dependente da Consellería de Economía e Industria, aprobou as modificacións normativas necesarias para facer posible que os investimentos impulsados na provincia de Ourense conten con maior intensidade de apoio financeiro, tanto pola vía das subvencións a fondo perdido como mediante préstamos directos con xuros subvencionados. Deste xeito, a Xunta de Galicia da un importante paso adiante en canto ao desenvolvemento do Plan Impulsa Ourense, que foi aprobado polo consello da Xunta desenvolvido na cidade das Burgas o pasado 22 de outubro e que fai posible que os investimentos impulsados polas pequenas empresas poidan recibir subvencións de ata o 50% na provincia.
Segundo a acordo adoptado polo consello de dirección do IGAPE, as Bases Reguladoras dos incentivos económicos do Instituto poderán acoller e apoiar investimentos a partir de 200.000 euros se a localización escollida é na provincia de Ourense, cando no nivel xeral de Galicia o mínimo investimento subvencionable ascende a 500.000 euros.
Por outra banda, no caso dos proxectos de primeira implantación en Galicia, en Ourense terán garantida unha subvención a fondo perdido mínima do 20%; e para creación de novos establecementos que non sexan de nova implantación pero si de ampliación, modernización ou innovación tecnolóxica, os proxectos a realizar en Ourense tamén terán un apoio mínimo do 15% dos custos subvencionables.
Neste mesmo consello aprobáronse tamén as bases que permitirán bonificar os xuros e comisións dos préstamos directos, con fondos BEI, destinados a financiar novos investimentos na provincia de Ourense. A solicitude destas axudas financeiras, aberta ata o 31 de decembro de 2010, poderá facerse ao mesmo tempo que se solicita o correspondente préstamo para impulsar un investimento.
No marco destas bases poderán ser obxecto de subvención os xuros e a comisión de apertura dos préstamos con fondos BEI para financiar investimentos en Ourense. A subvención de custos financeiros será pagada dunha soa vez, unha vez xustificada a aplicación do préstamo ás finalidades previstas, e irá destinada a minorar o principal do préstamo. Sen a subvención de xuros aplicable aos investimentos na provincia de Ourense, os préstamos BEI teñen uns xuros referenciados ao euríbor semestral, ao que debe sumarse un diferencial que oscilará entre o 0,5 e o 2%, dependendo dos factores de risco asociados ao proxecto.
As modificacións normativas aprobadas hoxe polo Instituto Galego de Promoción Económica afectan igualmente ás liñas de apoio que se convocan periódicamente polo sistema de concorrencia competitiva; neste caso, o criterio localización avaliarase co valor máximo para os proxectos a desenvolver na provincia de Ourense.
Ata o 50% de subvencións
Ademáis de incrementar do 30 ao 50% a porcentaxe máxima de apoio que poden recibir os investimentos realizados por pequenas empresas na provincia de Ourense, as empresas medianas tamén verán incrementado o apoio e poderán cubrir con axudas públicas ata o 40% dos investimentos que realicen na provincia. O Plan Impulsa Ourense tamén incorpora especial intensidade nos apoios da liña financeira regulada mediante o convenio do Igape co ICO, coas entidades financeiras e as sociedades de garantía recíproca; os apoios neste marco contan cunha subsidiación de 0,65 puntos con carácter xeral, subvención á que se engadirán 2 puntos porcentuais máis cando se trate de proxectos impulsados na provincia de Ourense, ata o 2,65 por cento.
O que persegue o programa Impulsa-Ourense é favorecer os investimentos produtivos para procurar un desenvolvemento harmónico, acelerando o desenvolvemento da provincia de Ourense e a súa equiparación coas provincias atlánticas. O obxectivo final, segundo explicou o presidente da Xunta logo da súa aprobación, e acadar o reequilibrio territorial e unha Galicia de velocidade única. |
|
| Última actualización ( 17/11/2009 ) |