UPD Coordina Local

A Fundación CEL Iniciativas por Lugo vén de presentar a duodécima edición dos seus Premios Empresariais, unha convocatoria arraigada na provincia coa que lanza novas fornadas de emprendedores e subliña o desenvolvemento das firmas que xa levan anos traballando en Lugo, así como distingue a aquelas que contribuíron á promoción exterior da provincia.

 

Uns premios que brindan unha grande axuda ós novos emprendedores e emprendedoras; axuda económica e de asesoramento especializado, dentro do viveiro de empresas que a Fundación CEL posúe, e tamén de proxección pública dos proxectos. Hoxe, moitas das ideas innovadoras presentadas en anteriores edicións son xa empresas consolidadas e negocios produtivos.

 

Dende a Fundación CEL faise un chamamento a estudantes, emprendedores/as e empresarios/as da provincia para que nesta difícil situación económica, de formulación de alternativas e de busca de oportunidades, presentes as súas propostas e aproveiten o apoio que se lles ofrece. O prazo de presentación de candidaturas permanecerá aberto ata o 29 de xaneiro do 2010.

 

 

A Fundación CEL Iniciativas por Lugo convoca a XII Edición dos Premios Empresariais con tres categorías distintas e seis premios.

 

PREMIOS Á INICIATIVA EMPRESARIAL
O obxectivo desta categoría é promover a creación de empresas e as actividades de investigación aplicables ás empresas. Dentro desta categoría convócanse tres modalidades:

Premio a Proxectos de Creación de Empresa
Este premio ten por finalidade recoñecer e incentivar a posta en marcha de proxectos viables e innovadores de creación de empresas que, polas súas características, sexan idóneos ou aconsellables para o seu desenvolvemento na provincia de Lugo. Poderán concorrer unha ou varias persoas que deseñen un proxecto de creación de empresa. 

 

Premio a Proxectos Universitarios de Creación de Empresa
Dirixido a mozos universitarios (un ou varios) estudantes do terceiro ciclo, doutorandos, tesinandos do Campus de Lugo, dos centros asociados da UNED na provincia de Lugo, ou de calquera outro Campus se a titulación non se imparte en Lugo, titulados nos últimos cinco anos, ou que estean nos dous últimos cursos dunha licenciatura ou diplomatura, coa finalidade de fomentar neles a conciencia e a vocación empresariais, incentivando a posta en marcha de proxectos empresariais viables.

Premio a Proxectos de Investigación e Innovación aplicada á Empresa
Premio a través do que se pretende promover a investigación, o desenvolvemento tecnolóxico e a innovación aplicables á empresa como elementos fundamentais para a creación e o mantemento dunha vantaxe competitiva para as empresas que lles posibilite unha mellor posición no mercado. Está destinado a investigadores, departamentos universitarios ou departamentos de I+D+i de empresas que realicen un proxecto de investigación e innovación aplicada á empresa.

PREMIOS Á ACTIVIDADE EMPRESARIAL
Con esta categoría recompensamos a aposta pola calidade e a creación de emprego e a traxectoria de empresas asentadas na provincia de Lugo. Son dúas as modalidades ás que poden concorrer os empresarios en activo:

Premio á Calidade, Seguridade Industrial e Protección Ambiental
Este premio ten por obxecto incentivar a incorporación ás empresas de proxectos que supoñan un avance cualitativo no sistema de xestión da calidade ou nos seus procedementos, incluíndo procesos de normalización e certificación, así como a dotación de equipamento específico, de forma que se potencien a calidade e a seguridade de produtos e instalacións industriais e, no seu caso, a protección do medio ambiente.

Premio ao Compromiso Social e á Creación de Emprego
Con esta modalidade queremos darlles un recoñecemento aos empresarios lucenses cunha traxectoria empresarial distinguida.

 

PREMIOS Á PROMOCIÓN
Premio a Proxectos de Promoción Exterior da Provincia de Lugo
A través da súa convocatoria pretendemos estimular proxectos e ideas que sirvan para "vender Lugo no exterior", destacando as vantaxes da provincia e as súas posibilidades económicas, culturais, turísticas e universitarias, e, en xeral, proxectos capaces de atraer investimentos, de xerar actividades que incrementen os fluxos comerciais ou ben de resaltar a dimensión social do sector empresarial da provincia de Lugo. Poderá presentar a súa candidatura nesta modalidade calquera persoa, física ou xurídica, pública ou privada, que deseñara ou puxera en marcha un proxecto que contribúa á promoción exterior da provincia de Lugo.