| Economía e Industria activa o fondo Xes-Innova para apoiar proxectos emprendedores innovadores |
 O fondo Xes-Innova ten como finalidade conceder préstamos participativos e/ou subscribir participacións en capital risco por contías comprendidas entre 60.000 e 200.000 euros, se ben, con carácter excepcional, eses límites poderán superarse. O novo fondo apoiará investimentos preferentemente asociados á innovación e ás novas tecnoloxías en ámbitos como as telecomunicacións, a biotecnoloxía, as enerxías renovables ou o medio ambiente.
Co obxectivo de dinamizar a posta en marcha deste novo instrumento ao servizo dos novos emprendedores innovadores en Galicia, a sociedade Xesgalicia subscribiu ademais un convenio de colaboración coa Federación de Xóvenes Empresarios (FEGAXE), que deste xeito participará no proceso de selección dos proxectos de investimento candidatos a acollerse ao Fondo Xes-Innova.
Xes-Innova ven a completar e mellorar o abano de instrumentos financeiros dispostos pola Consellería de Economía e Industria para apoiar o financiamento de proxectos impulsados por novos emprendedores. Entre estes instrumentos, destacan o programa re-Emprende, que concede subvencións a fondo perdido que poden cubrir entre o 15 e o 40 por cento dos investimentos, e o programa re-Imaxina, destinado a achegar financiamento bancario subsidiado e avalado no marco do correspondente convenio asinado polo Igape coas sociedades de garantía recíproca e as entidades financeiras.
|
|
| Última actualización ( 14/09/2010 ) |