UPD Coordina Local

A Cámara de Comercio de Lugo organiza un obradoiro sobre innovación que se celebrará ó longo de tres xornadas co obxectivo de capacitar ós asistentes sobre a importancia da innovación a través de metodoloxías e dinámicas de procesos.

 

O seminario "Ferramentas de xestión da innovación" contará coa participación de docentes cun alto grao de coñecemento no eido da innovación que dotarán ós asistentes das habilidades necesarias nas materias impartidas. Dirixido a persoas interesadas na xestión da I+D+i, o obradoiro centrarase na implantación dos sistemas de xestión da I+D+i sen deixar de lado os aspectos fiscais que afectan á materia.

 

Un obradoiro que se celebrará ó longo dos días 14, 15 e 16 de decembro na sede da FORCAM en Lugo en horario de mañá e tarde. Para poder asistir e participar é necesario inscribirse previamente.

 

 

A Cámara de Comercio de Ourense organiza unhas novas xornadas sobre innovación nas localidades de Ourense, O Barco de Valdeorras e Verín. Baixo o título "Porque innovar é marcar a diferenza" as xornadas informativas celebraranse ó mesmo tempo nas tres vilas e ó longo de dous días, o 9 e 10 de decembro.

 

Serán tres edicións nas que os participantes serán informados sobre a xestión de proxectos de I+D+i, a sistematización da xestión, a normativa de aplicación e o financimento, fiscalidade e axudas públicas que afectan ós proxectos de I+D+i. Cunha metodoloxía mixta teórico-práctica, os asistentes poderán coñecer de primeira man casos prácticos de proxectos xa postos en marcha e que acadaron un grande éxito.

 

Para participar en calquera das xornadas haberá que se inscribir en calquera das sedes da Cámara de Comercio de Ourense, sitas nas localidades nas que se celebrarán as sesións.

 

 

 

 

A Confederación de Empresarios da Coruña organiza unha xornada de debate sobre "Xestión da morosidade e Concurso de Acredores" no que participarán especialistas do ámbito xudicial, fiscal, económico e universitario.

 

Coa actual situación económica, reducíronse os ingresos nas empresas, incrementando o endebedamento a corto prazo e existindo unha maior restrición do crédito. Todo elo contribúe de xeito importante ó incremento do número de impagos nas empresas, así como no número de empresas concursadas. Por elo, a Confederación de Empresarios da Coruña (CEC), organiza esta xornada co obxectivo de abrir un foro de debate sobre a actual situación nas empresas e as posibles solucións ós problemas que teñen.

 

A xornada desenvolverase no Salón de Actos da CEC o vindeiro xoves, 3 de decembro, a partir das 16:00 horas. Para participar hai que confirmar a asistencia xa que as prazas son limitadas.

 

 

 

A Asociación de Jóvenes Empresarios de Lugo, AJE Lugo, vén de abrir o prazo para a presentación de candidaturas á segunda edición do Premio Xoven Empresario de Lugo no que colaboran as consellerías de Economía e Industria e de Traballo e Benestar, ademais do Concello de Lugo a Universidade de Santiago e o INLUDES. 

 

O premio ten como obxectivos o fomento da cultura emprendedora entre os mozos, a promoción do autoemprego e a creación de empresas entre a sociedade lucense, así como estimular e apoiar ós novos emprendedores e emprendedoras da provincia. Un premio que naceu no 2008 para contribuír á mellora do prestixio social dos xóvenes empresarios/as lucenses como creadores de riqueza e emprego e para incentivar os proxectos que xeren.

 

Para participar no Premio Xoven Empresario de Lugo, a empresa debe estar ubicada na provincia de Lugo e o empresario ou empresaria ser menor de 40 anos. Ademais, deberase acreditar que a empresa experimentou crecementos progresivos no número de empregados e na facturación.

 

A convocatoria permanecerá aberta ata o vindeiro 14 de decembro.

 

 

A Consellería de Economía e Industria impulsa a especialización dos Técnicos de Emprego e Axentes de Desenvolvemento Local para que estean en condicións de achegar un apoio máis eficiente aos autónomos de toda Galicia. Ese é o obxectivo do plan formativo que comezará a desenvolverse mañá.

 

Deste xeito, a través da UPD Coordina Local que dirixe o Igape, a Consellería de Javier Guerra segue a traballar en prol da mellora continua dos servizos de atención, asesoramento e apoio ós emprendedores/as e empresarios/as de Galicia a través da Rede de Técnicos de Emprego e Axentes de Desenvolvemento Local espallados polo territorio.

 

Logo da grande acollida que tivo o Servizo de Apoio ao Autónomo, con máis de 5.000 consultas recibidas no primeiro trimestre de funcionamento, a Consellería de Economía e Industria, a través da Unidade de Promoción e Desenvolvemento Coordina Local (UPD Coordina Local), impulsa agora un Plan de Formación Especializada sobre Autónomos co obxectivo de incrementar as competencias profesionais do persoal técnico de promoción económica.

 

As xornadas desenvolveranse en dez localidades do territorio, dende mañá mércores día 25 de novembro e ata o vindeiro 14 de decembro.

 

Co obxectivo de analizar e describir o procedemento axeitado para acceder ó financiamento público de proxectos de I+D+i, BIC Galicia organiza o obradoiro "Fondos Tecnolóxicos: estratexia a seguir para o financiamento de grandes proxectos de I+D+i consorciados" que se celebrará en Santiago de Compostela o vindeiro 2 de decembro.

 

BIC Galicia é un dos organismos cos que conta a Consellería de Economía e Industria para fomentar e facilitar a actividade emprendedora, así como a competitividade das empresas galegas. Dando cumprimento a estes obxectivos, o Centro Europeo de Empresas e Innovación de Galicia (BIC Galicia), organiza este seminario para fomentar a cultura da cooperación no eido da investigación e o desenvolvemento tecnolóxico, promovendo de xeito especial unha maior participación das PEMES en proxectos asociativos de diferente envergadura.

 

Cunha metodoloxía mixta teórico-práctica, ó longo da xornada destacados profesionais describirán o procedemento xeral para acceder a este tipo de fondos, utilizando como soporte o Manual para a presentación de proxectos consorciados, dentro do Programa Operativo de I+D+i Fondo Tecnolóxico. Os asistentes poderán participar nunha dinámica de grupo para realizar un caso práctico de constitución dun proxecto consorciado.