UPD Coordina Local

Baixo o título "Sociedades Cooperativas e Autoemprego", a Universidade da Coruña organiza a 3ª Edición do Curso de Emprendemento Cooperativo, que se celebrará a vindeira semana simultáneamente nos campus da Coruña e do Ferrol.

 

Dirixido ó alumnado da Universidade da Coruña e ós titulados/as universitarios/as, o curso desenvolverase cunha metodoloxía moi práctica e atractiva para os participantes xa que, ademais dos conceptos teóricos que se presentarán, participarán cun simulador de creación de empresas en liña. O Business Game ofrecerá a posibilidade de adquirir habilidades para a xestión dunha empresa con 15 horas de prácticas en liña.

 

O curso tamén conta cunha visita ó lugar de Chelo, en Betanzos, para que o alumnado poda comprobar in situ a xestión dun Aula de Natureza baixo a fórmula da cooperativa, e coa presenza de emprendedores que apostaron pola creación dunha cooperativa para pór en marcha os seus proxectos empresariais.

 

 

A Cámara de Comercio de Lugo organiza unha nova xornada formativa centrada nas empresas familiares. Baixo o título "O futuro do protocolo familiar: o que ninguén conta...", a xornada ten coma obxectivo amosar os problemas que existen e cómo superalos con éxito para que o protocolo familiar sexa algo máis que un documento nunha estantería.

 

Dirixida a aquelas familias que queran asegurar a permanencia do carácter de empresa familiar no tránsito da propiedade e xestión da mesma ás seguintes xeracións, a conferencia celebrarase o vindeiro mércores, 18 de novembro, en horario de tarde, no Edificio FORCAM.

 

Ó longo da tarde falarase do protocolo familiar, das principais ferramentas xurídicas para a continuidade da empresa familiar e das modificacións da nova Lei de Dereito Civil de Galicia, entre outros temas.

 

 

A Confederación Empresarial de Ourense, CEO, organiza a xornada "Pautas e recomendacións para emprender: experiencias de éxito empresarial" que se celebrará o vindeiro martes, 17 de novembro na sede da CEO.

 

Unha xornada na que se presentará o libro "Emprendedores: 25 casos de éxito en el mundo empresarial" do xornalista e escritor Pedro Meyer que servirá de fío condutor para analizar e debater as distintas experiencias empresariais que se narran no libro e que acadaron o éxito profesional.

 

A xornada e presentación terá lugar a partir das 13:00 horas, debendo confirmar a súa asistencia aquelas persoas que desexan participar. Os asistentes recibirán un exemplar do libro, publicado por Pedro Meyer en febreiro deste mesmo ano.

 

 

A Cámara de Ourense organiza a segunda edición das "Xornadas de Arbitraxe Mercantil" ó abeiro do Programa de Formación para empresarios/as e emprendedores/as da provincia. 

 

Unha xornada na que se desenvolverán dúas mesas redondas de debate e na que participarán destacadas personalidades e relatores do ámbito xudicial, económico e universitario.

 

Nesta segunda edición, o contido da xornada formativa centrarase nos non pagamentos e nas solucións para cobralos. Baixo o título "Receitas e vías para cobrar os non pagamentos", ó longo dos relatorios analizarase polo miúdo a Lei de Morosidade 3/2004. Outros dos temas de debate no que poderán participar os asistentes será a Arbitraxe Mercantil no sector inmobiliario. 

 

A xornada celebrarase o vindeiro martes, 17 de novembro, na sede da Cámara de Comercio e Industria de Ourense en horario de tarde. É necesaria a inscrición previa para poder asistir.

 

 

A Asociación de Empresarias da Coruña, AECO, organiza en colaboración co BIC Galicia un novo seminario de formación gratuíta dirixido a xerentes e persoal de PEMES, profesionais independentes, responsables de departamentos comerciais e vendedores ou responsables de vendas.

 

Baixo o título de "Comunicación Empresarial, publicidade para PEMES", a xornada pretende ofrecer ós asistentes un coñecemento básico dos diferentes  aspectos prácticos e teóricos da publicidade, ademais de pór sobre a mesa formación suficiente que permita o deseño de campañas publicitarias na PEME ós participantes. Un seminario no que se analizará os efectos da publicidade nas relacións coas restantes variables do marketing e que posibilitará a adquisición de estratexias publicitarias básicas que permitan a súa aplicación práctica no eiedo profesional.

 

O Seminario celebrarase na sede da Asociación de Empresarias da Coruña ó longo dos días 11 e 12 de novembro, en horario de tarde. Para poder asistir, haberá que se inscribir previamente.

 

 

A Consellería de Traballo e Benestar abriu a convocatoria para o ano 2009 do Programa de Apoio ás novas iniciativas empresariais promovidas por persoas desempregadas que xa esgotasen as súas prestacións por desemprego e que, ademais, xeren emprego estable para persoas demandantes de emprego.

 

O Programa de fomento das iniciativas emprendedoras e de emprego (I+E+E) inclúe catro tipos de axudas: subvención á xeración de emprego estable, subvención financeira, subvención para asistencia técnica e subvención para o inicio da actividade.

 

Poderán solicitar as axudas empresas privadas -calquera que sexa a forma xurídica que adopten-, agás as persoas físicas, comunidades de bens, sociedades civís, sociedades cooperativas e sociedades laborais. As empresas deberán cumprir as condicións e os requisitos establecidos na orde para cada tipo de axuda. O prazo de presentación de solicitudes rematará o vindeiro 23 de novembro.