UPD Coordina Local

A Cámara de Comercio de Lugo celebrará neste mes de outubro dúas novas xornadas de formación gratuíta dirixidas a empresarios/as e industriais da zona. Trátase dunha acción formativa centrada no eido do medioambiente que se desenvolverá en dúas xornadas diferenciadas.

 

A primeira delas, que terá lugar o 22 de outubro, xoves, a partir das 19h., estará dedicada á Lei de Responsabilidade Medioambiental. Unha xornada na que se analizarán as directrices da UE en materia de responsabilidade ambiental, así como as principais obrigas dos/as empresarios/as derivadas da aplicación da dita lei.

 

A segunda xornada formativa celebrarase o vindeiro xoves 29 de outubro, tamén en horario de tarde, cun tema máis concreto: Residuos Industriais, a súa normativa e xestión. Día no que se explicará a normativa xeral e específica en materia de residuos, ademais das obrigas que implica para produtores e xestores.

 

As xornadas teñen carácter gratuíto, polo que será necesario inscribirse previamente. A celebración terá lugar no Edificio FORCAM, da Cámara de Lugo.

 

O Concello de Ribadavia organiza unha xornada de difusión e promoción do Cooperativismo como fórmula empresarial que terá lugar este venres, día 23, pola tarde.

 

Baixo o título "As cooperativas: unha alternativa en tempos de crise", a xornada pretende dar a coñecer a figura da cooperativa como unha alternativa laboral, ademais de explicar polo miúdo que son as cooperativas e os tipos que existen.

 

Dirixida a emprendedores/as principalmente, e máis ó público en xeral, ó longo desta xornada divulgativa farase un repaso por aquelas empresas recoñecidas que optaron pola fórmula da cooperativa, analizando exemplos prácticos do sector.

 

A xornada celebrarase no Viveiro de Empresas do Concello de Ribadavia; un relatorio que será gratuíto, sendo necesario inscribirse previamente.

A Secretraría Xeral da Emigración organiza esta xornada co obxectivo de ofrecer unha visión práctica das políticas de emprego que se están a desenvolver no eido da emigración. Co subtítulo de Experiencias e orientacións prácticas, búscase que os participantes podan intercambiar coñecementos e boas prácticas en pequenos grupos de traballo.

 

Pola mañá exporase a situación das terefas que se están a desenvolver para a modificación da Lei de Estranxeiría; asemade, presentaranse experiencias de inserción sociolaboral realizadas en varias Comunidades Autónomas. Xa pola tarde será a quenda dos obradoiros, moderados por expertos, sobre diversas materias: economía social, emprendemento e orientación e intermediación laboral.

 

A xornada terá lugar o vindeiro 27 de outubro, na sede da Escola Galega da Administración Pública, en Santiago de Compostela. É necesaria inscrición previa, ata completar o aforo de 100 participantes (33 en cada obradoiro).

 

 

 

O Pazo de Feiras e Congresos de Lugo acollerá unha xornada de debate e análise sobre o fenómeno social de Internet e a súa repercursión no sector empresarial. Baixo o título "Web 2.0, ¿moda ou realidade empresarial?" terá lugar unha nova xornada demostrativa do Proxecto Emprende TIC 2009, programa da Fundación CEL que quere achegar aos emprendedores/as e novos/as empresarios/as as tecnoloxías da información e da comunicación. 

 

Ó longo da tarde realizarase un percorrido polas ferramentas tecnolóxicas de comunicación máis innovadoras, dende o sms ás redes sociais, analizando o fenómeno da socialización en Internet e a explosión das redes sociais co obxectivo de mostrar a súa utilidade empresarial, así como as súas implicacións sociais, legais e comerciais.

 

A xornada celebrarase o vindeiro xoves, 22 de outubro, a partir das 19:00 horas. É necesaria inscrición previa.

A Cámara de Comercio e Industria de Lugo organiza unha xornada informativa sobre o Programa da UE "Adaptación da Empresa á Economía Dixital".
 
Trátase dunha iniciativa de ámbito estatal dirixida a promover a incorporación das TIC (Tecnoloxías da Información e da Comunicación) nos procesos de traballo das pequenas e medianas empresas. 
 
A xornada terá lugar o vindeiro 22 de outubro na sede da Cámara de Lugo en horario de mañá, a partir das 12hs. Para asistir haise que inscribir xa que o aforo é limitado.

 

O programa, promovido polo Consello Superior de Cámaras, está incluído nos Programas Operativos para as rexións de Converxencia no seu Eixe 2 “Desenvolvemento e Innovación Empresarial”, estando cofinanciado polo Fondo Europeo de Desenvolvemento Rexional (FEDER) e polo Ministerio de Industria, Turismo e Comercio.

O Concello de Santiago de Compostela e o BIC Galicia organizan unha nova edición da Xornada "Emprende en Compostela" que se celebrará o vindeiro 27 de outubro no Pazo de Exposicións e Congresos de Galicia.

 

Baixo o título de "Estratexias para o emprendemento en tempo de crise", a xornada está dirixida ás persoas interesadas en desenvolver un proxecto empresarial nos vindeiros anos e ás que están dando os seus primeiros pasos ó fronte dunha empresa ou proxecto emprendedor.

 

Este ano conta cun novo espazo de promoción para aquelas empresas de Santiago de Compostela no que poderán informar ós asistentes e entidades participantes sobre oo servizos e produtos que ofrecen.