UPD Coordina Local

A Consellería de Economía e Industria, a través do IGAPE, busca deste xeito facilitar o acceso ao crédito aos emprendedores para que podan impulsar novos investimentos.

Os préstamos contarán co aval dunha sociedade de garantía recíproca que cubrirá o 80% do importe e as entidades financeiras non poderán requirir garantías adicionais.

Os xuros efectivos para os beneficiarios, que serán fixos para microempresas e referenciados ao euríbor nas liñas para novas PEMES e PEMES competitivas, estarán arredor do 3%.

O plan re-imaXina mobilizará 15 millóns de euros en préstamos para investimentos de microempresas

  

Habilitar préstamos subsidiados e avalados por un importe de ata 15 millóns de euros para apoiar o financiamento dos investimentos impulsados por novas pemes, para pemes que queren medrar ou renovarse para mellorar en competitividade ou para microempresas galegas, é o obxectivo do programa que vai poñer en marcha a Consellería de Economía e Industria a través do Instituto Galego de Promoción Económica. Este novo instrumento financeiro xuntase aos xa existentes no Instituto, que fixeron posible a concesión de préstamos a empresas por importe de 280 millóns de euros no que vai de ano, fronte aos só 47 millóns concedidos no mesmo periodo de 2008.
 
O Plan re-imaXina facilitará a concesión polas entidades financeiras de préstamos por importe de ata 15 millóns de euros, eliminando dous dos atrancos que adoitan dificultar o acceso das empresas de menos dimensión –microempresas, autónomos e emprendedores- ao financiamento, as garantías e os custos de xestión. O xuro efectivo para os beneficiarios destes préstamos avalados roldará o 3%. As bases desta nova liña financeira publicáronse no DOG o día 30 de xullo e a presentación de solicitudes estará aberta ata o próximo 30 de decembro.
 
 As microempresas e pemes beneficiarias deste programa de apoio impulsado polo Instituto que preside o conselleiro de Economía e Industria, Javier Guerra, poderán dispoñer de préstamos que contarán co aval dunha SGR polo 80% do importe do financiamento. Nin as entidades financeiras nin as SGR poderán requirir dos solicitades máis garantías adicionais que as persoais dos promotores da actividade empresarial. Os beneficiarios tampouco deberán pagar á entidade financeira ou SGR correspondente ningún outro custo derivados da operación acollida a esta liña.
 
 As achegas do Igape fan posible que os xuros dos préstamos concedidos polas entidades financeiras ao amparo deste programa serán fixos, do 3,14%, no caso dos destinados a microempresas. Os préstamos para novas pemes e pemes competitivas serán variables e estarán referenciados ao euríbor a seis meses máis; en 2009,  o xuro efectivo dos préstamos concedidos nestas dúas liñas será do 2,98%.
 
Os préstamos concedidos ao abeiro destas bases, e no marco do correspondente convenio que o IGAPE asinou coas entidades financeiras adheridas e á sociedades de garantía recíproca que operan en Galicia, terán un prazo de amortización de ata 5 anos, no caso da liña para as microempresas, e de 5 a 7 anos nos concedidos nas liñas para novas pemes e pemes competitivas. En todos os casos, os prazo poderán incluir ata 1 ano de carencia na amortización do capital.
 
 Flúe o financiamento
Durante os sete primeros meses de 2009, o Instituto Galego de Promoción Económica concedeu apoio a un total de 3.242 solicitudes de apoio empresarial, fronte ás 953 solicitudes atendidas positivamente no mesmo periodo do ano anterior.
 
 O incremento máis significativo rexistrouse no programa financiero, onde se pasou de 599 proxectos aprobados nos sete primeiros meses de 2008 a 2.442 no mesmo periodo de 2009, debido sobre todo á posta en marcha da liña para o financiamento de circulante e refinanciamento de pasivos das empresas en dificultades. Se entre xaneiro e xullo de 2008 se habilitaron préstamos subsidiados por importe de 47 millóns de euros ao amparo do programa financeiro do Igape, no que vai de 2009 superouse xa a cifra de 280 millóns.
 
 Tamén se incrementou a demanda e o nivel dos apoios concedidos polo Igape no marco dos seus programas orientados a favorecer a mellora da produtividade e a competitividade das pemes. De 177 proxectos apoiados nos sete primeiros meses de 2008 pasouse a 319 proxectos no que vai de 2009; ás subvencións destinadas a apoiar esas iniciativas empresariais pasaron de 1,4 millóns de euros en 2008 a 2,48 en 2009.
 
 Do mesmo xeito, medrou de xeito significativo o número de iniciativas apoiadas para favorecer a internacionalización das empresas galegas. Así, dos 88 proxectos apoiados neste eido entre xaneiro e xullo de 2008 pasouse a 175 no mesmo periodo deste ano.